Ka min cu Tial Awi a si. Khuabung khuami Pu Ni Cung le Pi Mah Hniang hna I an fa le paruk lak ah a palinak ka si. June 10, 2010, ah USA kan phan I August 4, 2012, ah kan nu Dawt Hlei Iang he Indianapolis khua ah thitumhnak kan tuah. Pathian nih fapa pathum thluachuah a kan pek. Ka fapa pahnihnak kan ngeih hlan deuh February 2017, ah Rev. Dr. Tuan Peng Thang nih Johan 8:32 “Biatak cu nan hngalh lai I biatak nih cun an luatter hna lai” timi thawngtha a chimmi ka ngeihnak in Pathian dawtnak ka thei. Pathian dawtnak ka theih in Pathian Bia cawn duhnak kan thinlung ah a rat caah Pathian Bia cawn ding in biachahnak ka tuah. Kum thum chung Pathian Bia cawng kho ding in thlacamnak ka ngeih hnu ah Pathian nih innka a ka on piak I kum 2020 ah Indiana Bible College ah Pathian Bia cawn kan thok. 2024 ah Pathian thawng in sianginn ka dih. Sianginn ka dih in Indiana Zion Baptist Church ah Christian Education Director ka tuan. Sau ka tuan manh hlan ah Chin Mission Church, Bowling Green, Kentucky nih caan tling Pastor caah an ka sawm I Pathian sin ah thla ka cam tik ah Pathian auhnak a si ko tiah ka zumh caah an ka sawnnak cu ka cohlan I March 01, 2025 ah kan chung tein Bowling Green, KY ah kan I thial. A tu hi Chin Mission Church, Bowling Green, KY ah Pastor rian kan tuan cuahmah lio a si. Pathian rian ka tuannak ah ka hmaitlak bikmi cu Khrihfabu chung I Pathian dawtnak a thei cangmi vialte thlarau ti rawl khim tein cawm khawh le Pathian dawtnak a thei rih lomi vialte sinah Jesuh Khrih thawngtha an pemh ve khawhnak hnga chimh hi a si. A rian tuan dingah a ka thim I a rian a ka hrawmtu le rian tha tuan khawhnak thazang le damnak a ka petu Pathian min ka thangthat. Bawipa nih sunparnak co ko seh!